ಅರಿಶಿನದ ಎಲೆಗಳು ಅಥವಾ ಹಲ್ದೀ ಪತ್ತಾ ಎಂಬ ಹೆಸರಿನಲ್ಲಿ ಮಾರುಕಟ್ಟೆಯಲ್ಲಿ ಮಾರಾಟಕ್ಕೆ ಬರುವ ಎಲೆಗಳ ಕಟ್ಟುಗಳನ್ನು ನಾವು ಸಿಹಿ ಕಡುಬು ಮತ್ತು ಅಡಾ ಮೊದಲಾದ ತಿಂಡಿಗಳನ್ನು ಮಾಡಲು ಮಾತ್ರವೇ ಬಳಸುತ್ತೇವೆ. ಈ ಎಲೆಗಳಲ್ಲಿ ಕಡುಬಿನ ಹಿಟ್ಟು ತುಂಬಿಸಿ ಬೇಯಿಸಿದ ಬಳಿಕ ಕಡುಬಿಗೆ ಬರುವ ರುಚಿ ಮತ್ತು ಪರಿಮಳ ಮಾತ್ರ ವರ್ಣಿಸದಳ. ಆದರೆ, ಈ ಎಲೆಗಳ ಮಹತ್ವ ಕೇವಲ ತಿಂಡಿ ಮಾಡಲಿಕ್ಕೆ ಮೀಸಲಾಗಿಲ್ಲ, ಬದಲಿಗೆ ಇವುಗಳಲ್ಲಿ ಅದ್ಭುತವಾದ ಆರೋಗ್ಯಕರ, ಸೌಂದರ್ಯವರ್ಧಕ ಹಾಗೂ ಚಿಕಿತ್ಸಕ ಗುಣಗಳೂ ಇವೆ.
ಅರಿಶಿನ ಭಾರತದ ಅತ್ಯಂತ ಪುರಾತನ ಮಸಾಲೆ ವಸ್ತುವಾಗಿದೆ ಹಾಗೂ ಆಯುರ್ವೇದವಂತೂ ಅರಿಶಿನವನ್ನು ಕಳೆದ ನಾಲ್ಕು ಸಾವಿರಕ್ಕೂ ಹೆಚ್ಚು ವರ್ಷಗಳಿಂದ ಹಲವಾರು ಕಾಯಿಲೆಗಳಿ ಚಿಕಿತ್ಸೆ ನೀಡಲು ಬಳಸುತ್ತಾ ಬಂದಿದೆ. ಅಲ್ಲದೇ ಕೆಲವೇ ಮಸಾಲೆ ವಸ್ತುಗಳಿಗೆ ಸಲ್ಲುವ ಧಾರ್ಮಿಕ ಮಹತ್ವವೂ ಅರಿಶಿನಕ್ಕೆ ಲಭಿಸಿದೆ. ಅರಿಶಿನ, ಕುಂಕುಮ ಪೂಜೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ.
ಗೃಹಿಣಿಯರಿಗಂತೂ ಅರಿಶಿನ ಕೇವಲ ಒಗ್ಗರಣೆಯ ವಸ್ತುವಲ್ಲ, ಬದಲಿಗೆ ಗಾಯವಾದರೆ ತಕ್ಷಣ ಬಳಸುವ ಚಿಕಿತ್ಸೆಯೂ ಹೌದು. ತುರಿಕೆ ಆಯಿತೇ ಅರಿಶಿನ, ಮೊಡವೆಯೇ, ಅರಿಶಿನ, ಹೀಗೆ ಅರಿಶಿನ ಹಲವಾರು ಬಗೆಗಳಲ್ಲಿ ಬಳಸಲ್ಪಡುತ್ತಿದೆ. ಅರಿಶಿನದ ಬೇರನ್ನು ತಾಳಿ ಗುಂಡಿನ ಬದಲಾಗಿ ಕಟ್ಟುವುದೂ ಕೆಲವು ಸಂಪ್ರದಾಯಗಳಲ್ಲಿದೆ. ಆದರೆ, ಅರಿಶಿನ ಎಲೆಗಳನ್ನು ಅಡುಗೆಯ ಹೊರತಾಗಿ ಇತರ ಪ್ರಯೋಜನಗಳಿಗೆ ಬಳಸುವುದು ಮಾತ್ರ ಹೆಚ್ಚಾಗಿ ಪ್ರಚಲಿತವಿಲ್ಲ.
ಅರಿಶಿನದ ಪುಡಿಯಂತೆಯೇ ಇದರ ಎಲೆಗಳಲ್ಲಿಯೂ ಕುರ್ಕುಮಿನ್ ಎಂಬ ಪೋಷಕಾಂಶವಿದೆ. ಇದೊಂದು ಪ್ರಬಲ ಅಂಟಿ ಆಕ್ಸಿಡೆಂಟ್ ಆಗಿದ್ದು ಅರಿಶಿನದ ಬಹುತೇಕ ಪ್ರಯೋಜನಗಳು ಇದರಿಂದಲೇ ದೊರಕುತ್ತವೆ. ಅರಿಶಿನದ ಎಲೆಗಳನ್ನು ದಕ್ಷಿಣ ಏಷ್ಯಾದಲ್ಲಿ ಹೆಚ್ಚಾಗಿ ಬೆಳೆಯಲಾಗುತ್ತದೆ. ಈ ಎಲೆಗಳಲ್ಲಿ ಪ್ರತಿಜೀವಕ ಮತ್ತು ಕ್ಯಾನ್ಸರ್ ನಿವಾರಕ ಗುಣಗಳೂ ಇವೆ. ಆದರೆ, ಇವು ಪ್ರಬಲ ಗುಣಗಳಾಗಿರುವ ಕಾರಣ ಇವುಗಳನ್ನು ಮಿತಿಯಲ್ಲಿಯೇ ಬಳಸಬೇಕು. ಕುರ್ಕುಮಿನ್ ಸೇವನೆ ಅತಿಯಾದರೂ ಅನಾರೋಗ್ಯಕ್ಕೆ ಕಾರಣವಾಗಬಹುದು. ಆದ್ದರಿಂದ ಇವುಗಳ ಬಳಕೆಯನ್ನು ಔಷಧೀಯ ರೂಪದಲ್ಲಿ ಮಾಡುವುದಾದರೆ ತಜ್ಞರ ಸಲಹೆ ಪಡೆಯುವುದು ಸೂಕ್ತ. ಅರಿಶಿನದ ಎಲೆಗಳ ಕೆಲವು ಪ್ರಯೋಜನಗಳನ್ನು ನೋಡೋಣ:
ಅಡುಗೆ ಮನೆಯಲ್ಲಿ
ಅರಿಶಿನ ಪುಡಿ ಅಥವಾ ಕೊಂಬು ಮನೆಯಲ್ಲಿ ಮುಗಿದು ಹೋದರೆ, ಅರಿಶಿನದ ಎಲೆಗಳನ್ನು ಚೆನ್ನಾಗಿ ಒಣಗಿಸಿಟ್ಟ ಪುಡಿಯನ್ನೂ ಬದಲಿಯಾಗಿ ಬಳಸಬಹುದು. ಬಳಸುವ ಮುನ್ನ ಕೊಂಚ ನೀರಿನಲ್ಲಿ ನೆನೆಸಿದರೆ ಸಾಕು. ಅಚ್ಚರಿ ಎಂದರೆ, ಈ ಪುಡಿಯೂ ಅರಿಶಿನದ ಪುಡಿಯಂತೆ ಹಳದಿಯೇ ಇರುತ್ತದೆ. ಈ ಒಣಗಿದ ಎಲೆಗಳ ಪುಡಿಯನ್ನು ಭಾರತ, ಥಾಯ್ಲೆಂಡ್ ಮತ್ತು ಮಲೇಷ್ಯಾದ ಅಡುಗೆಗಳಲ್ಲಿ ಬಳಸಲಾಗುತ್ತದೆ. ನಮ್ಮ ಮಂಗಳೂರು ಕಡೆಯ ಕರಾವಳಿ ಪ್ರದೇಶದಲ್ಲಿ ಅರಿಶಿನದ ಎಲೆಗಳನ್ನು “ಪಾತೋಲಿ” ಎಂಬ ಸಿಹಿತಿಂಡಿಯನ್ನು ಮಾಡಲು ಬಳಸಲಾಗುತ್ತದೆ.
ಕೊಂಕಣಿ ಕುಟುಂಬಗಳಲ್ಲಿ ಹಲ್ದಿಕೊಲ್ಯಾಚೆ ಪಾತೋಲಿ ಎಂದೂ ಕರೆಯುತ್ತಾರೆ. ಈ ಎಲೆಗಳ ಮೇಲೆ ಅಕ್ಕಿ ಹಿಟ್ಟಿನ ರೊಟ್ಟಿಯನ್ನು ತಟ್ಟಿ ಒಳಗೆ ತೆಂಗಿನ ತುರಿ ಬೆಲ್ಲ ಅಥವಾ ತೆಂಗಿನ ತುರಿ ಮತ್ತು ಮೆಣಸಿನ ಮಸಾಲೆಯ ಹೂರಣವನ್ನು ತುಂಬಿಸಿ ಮಧ್ಯದಲ್ಲಿ ಮಡಚಿ ಅಂಚುಗಳನ್ನು ಬೆಸೆದು ಇಡ್ಲಿ ಪಾತ್ರೆಯಲ್ಲಿ ಹಬೆಯಲ್ಲಿ ಬೇಯಿಸಲಾಗುತ್ತದೆ. ಇದು ಅತ್ಯಂತ ರುಚಿಕರ ಮಾತ್ರವಲ್ಲ ಎಣ್ಣೆ ಅತ್ಯಲ್ಪವಾಗಿ ಬಳಸುವ ಕಾರಣ ಆರೋಗ್ಯಕರವೂ ಆಗಿದೆ.
ಜೀರ್ಣಕ್ರಿಯೆಯನ್ನು ಉತ್ತಮಗೊಳಿಸುತ್ತದೆ
ಅರಿಶಿನದ ಎಲೆಗಳನ್ನು ಒಣಗಿಸಿ ಮಾಡಿದ ಪುಡಿಯ ಸೇವನೆಯಿಂದ ಜೀರ್ಣಕ್ರಿಯೆ ಉತ್ತಮಗೊಳ್ಳುತ್ತದೆ ಹಾಗೂ ಹೊಟ್ಟೆಯುಬ್ಬರಿಕೆ ಮತ್ತು ವಾಯುಪ್ರಕೋಪದಂತಹ ತೊಂದರೆಗಳು ಇಲ್ಲವಾಗುತ್ತವೆ. ಕುರ್ಕುಮಿನ್ ಪಿತ್ತರಸದ ಉತ್ಪಾದನೆಗೆ ಪ್ರಚೋದನೆ ನೀಡುತ್ತದೆ ಎಂದು ಹೇಳಲಾಗುತ್ತದೆ. ಈ ಪಿತ್ತರಸ ಜೀರ್ಣಕ್ರಿಯೆಯನ್ನು ಸುಲಭಗೊಳಿಸುತ್ತದೆ.
ಪ್ರಬಲ ಉರಿಯೂತ ನಿವಾರಕ ಗುಣಗಳು
ಈ ಎಲೆಗಳಲ್ಲಿರುವ ಕುರ್ಕುಮಿನ್ ನಿಂದಾಗಿ ಪ್ರಬಲ ಉರಿಯೂತ ನಿವಾರಕ ಗುಣಗಳನ್ನು ಪಡೆದಿದೆ. ವಿಶೇಷವಾಗಿ, ಓಸ್ಟಿಯೋ ಸಂಧಿವಾತ ಅಥವಾ ಓಸ್ಟಿಯೋಆರ್ಥ್ರೈಟಿಸ್ ಮತ್ತು ರ್‍ಹುಮಟಾಟ್ಕ್ ಆರ್ಥ್ರೈಟಿಸ್ ಎಂಬ ಸಂಧಿವಾತ ಹೊಂದಿರುವ ವ್ಯಕ್ತಿಗಳಿಗೆ ಈ ಎಲೆಗಳು ಅತ್ಯುತ್ತಮ ಔಷಧಿಯಾಗಿವೆ. ತಜ್ಞರ ಪ್ರಕಾರ, ಇದರಲ್ಲಿರುವ ಜೈವಿಕ ಸಂಯುಕ್ತಗಳು ಸಂಧಿವಾತದ ನೋವನ್ನು ಕಡಿಮೆ ಮಾಡಲು ನೆರವಾಗುತ್ತವೆ. ಆದರೆ, ಇದಕ್ಕಾಗಿ ಕುರ್ಕುಮಿನ್ ಅನ್ನು ಹೆಚ್ಚಿನ ಪ್ರಮಾಣದಲ್ಲಿ ತೆಗೆದುಕೊಳ್ಳಬಾರದು. ರೋಗಿಯ ಸಂಧಿವಾತದ ಸ್ಥಿತಿ ಮತ್ತು ಇತರ ಆರೋಗ್ಯ ಅಂಶಗಳನ್ನು ಪರಿಗಣಿಸಿ ವೈದ್ಯರೇ ಅಗತ್ಯ ಪ್ರಮಾಣವನ್ನು ನಿರ್ಧರಿಸುತ್ತಾರೆ.
ಸೌಂದರ್ಯವರ್ಧಕ ಗುಣಗಳು
ಅರಿಶಿನದಲ್ಲಿರುವ ಕುರ್ಕುಮಿನ್ ಸೌಂದರ್ಯ ಸಂಬಂಧಿ ತೊಂದರೆಗಳಿಗೂ ಚಿಕಿತ್ಸೆ ನೀಡಲು ಸಮರ್ಥವಾಗಿದೆ. ಅರಿಶಿನದ ಎಲೆಗಳನ್ನು ಚೆನ್ನಾಗಿ ಒಣಗಿಸಿ ಕುಟ್ಟಿ ಪುಡಿ ಮಾಡಿ ಅರೆದು ಲೇಪದ ರೂಪದಲ್ಲಿ ಚರ್ಮಕ್ಕೆ ಹಚ್ಚಿಕೊಳ್ಳಬಹುದು. ಈ ಲೇಪ ತ್ವಚೆಯನ್ನು ಸೌಮ್ಯ, ನುಣುಪು ಹಾಗೂ ಕಾಂತಿಯುಕ್ತವಾಗಿಸುತ್ತದೆ. ಅಲ್ಲದೇ ನಿಯಮಿತವಾಗಿ ಹಚ್ಚಿಕೊಳ್ಳುತ್ತಾ ಇದ್ದರೆ ಹಳೆಯ ಮೊಡವೆಗಳ ಕಲೆಗಳೂ ನಿಧಾನವಾಗಿ ಕಣ್ಮರೆಯಾಗಿ ಸಹಜವರ್ಣ ಪಡೆಯುತ್ತದೆ.
ಪ್ರತಿಜೀವಕ ಗುಣಗಳು
ಅರಿಶಿನದಲ್ಲಿರುವ ಕುರ್ಕುಮಿನ್ ಉರಿಯೂತ ನಿವಾರಕ, ಬ್ಯಾಕ್ಟೀರಿಯಾ ನಿವಾರಕ ಮತ್ತು ವೈರಸ್ ನಿವಾರಕ ಗುಣಗಳನ್ನು ಪಡೆದಿದೆ ಹಾಗೂ ಇದು ಗುಣಪಡಿಸುವಿಕೆಯನ್ನು ತೀವ್ರಗೊಳಿಸುತ್ತದೆ. ಇದಕ್ಕಾಗಿ ಚೆನ್ನಾಗಿ ಒಣಗಿರುವ ಅರಿಶಿನದ ಎಲೆಗಳನ್ನು ಪುಡಿಮಾಡಿ ಕೊಂಚವೇ ನೀರಿನೊಂದಿಗೆ ಅರೆದು ಲೇಪವಾಗಿಸಿ ಒಂದು ಬಾಟಲಿಯಲ್ಲಿ ಸಂಗ್ರಹಿಸಿ ಫಿಜ್ಜಿನಲ್ಲಿಡಿ. ಚಿಕ್ಕ ಪುಟ್ಟ ಸುಟ್ಟ ಗಾಯ, ಕತ್ತಿಯ ಅಲಗು ತಾಗಿ ಆದ ಗಾಯ, ಚರ್ಮದ ತುರಿಕೆ, ಬೆವರು ಸಾಲೆ ಮೊದಲಾದ ತೊಂದರೆಗಳಿಗೆ ನೇರವಾಗಿ ಹಚ್ಚಿ, ಪಟ್ಟಿ ಕಟ್ಟದಿರಿ. ಈ ಗಾಯಗಳು ಶೀಘ್ರವಾಗಿ ಮಾಗುವುದನ್ನು ಕಣ್ಣಾರೆ ನೋಡುವಿರಿ.
ತೆಂಗಿನಂತೆಯೇ ಅರಿಶಿನ ಕೂಡಾ ತನ್ನ ಪ್ರತಿ ಭಾಗದಲ್ಲಿಯೂ ಒಂದಲ್ಲಾ ಒಂದು ಪ್ರಯೋಜನವನ್ನು ನೀಡುವ ಬೆಳೆಯಾಗಿದೆ. ಅರಿಶಿನದ ಗಿಡಗಳನ್ನು ಬೆಳೆಯುವುದೂ ಅಷ್ಟು ಕಷ್ಟವಲ್ಲ, ಹಸಿ ಅರಿಶಿನದ ಕೊಂಬುಗಳನ್ನು ಮರಳುಮಿಶ್ರಿತ ಮಣ್ಣಿನಲ್ಲಿ ಇರಿಸಿ ಆಗಾಗ ನೀರು ಹಾಯಿಸಿದರೆ ಹೆಚ್ಚಿನ ಆರೈಕೆ ಇಲ್ಲದೇ ತಾನೇ ಬೆಳೆಯುತ್ತದೆ. ಇದು ಸಾಧ್ಯವಾಗದೇ ಇದ್ದರೆ, ಅರಿಶಿನದ ಎಲೆಗಳು ಲಭ್ಯವಿರುವಾಗ ತಂದು ಚೆನ್ನಾಗಿ ಒಣಗಿಸಿ ಕುಟ್ಟಿ ಪುಡಿ ಮಾಡಿ ಗಾಳಿಯಾಡದ ಬಾಟಲಿಯಲ್ಲಿ ಸಂಗ್ರಹಿಸಿಟ್ಟರೆ ವರ್ಷಗಟ್ಟಲೇ ಬಳಸಬಹುದು.